Pāṭidesanīyakaṇḍo
1.
Sappiviññāpanasikkhāpadavaṇṇanā
Pāṭidesanīyesu paṭhame sappinti pubbe vuttavinicchayaṃ pāḷiāgataṃ gosappiādimeva. Viññāpetvā bhuñjeyyāti ettha ‘‘viññattiyā paṭiladdhaṃ bhuñjissāmī’’ti gahaṇe dukkaṭaṃ, gahitassa ajjhohāre ajjhohāre pāṭidesanīyaṃ.
Sāvatthiyaṃ chabbaggiyā bhikkhuniyo ārabbha sappiṃ viññāpetvā bhuñjanavatthusmiṃ paññattaṃ, ‘‘agilānā’’ti ayamettha anupaññatti, tikapāṭidesanīyaṃ, gilānāya dvikadukkaṭaṃ. Yā pana gilānā gilānasaññā, gilānakāle vā viññāpetvā pacchā agilānā hutvā bhuñjati, gilānāya vā sesakaṃ, ñātakappavāritaṭṭhānato vā viññattaṃ, aññassa vā atthāya, attano vā dhanena gahitaṃ bhuñjati, tassā, ummattikādīnañca anāpatti. Vuttalakkhaṇasappitā, anuññātakāraṇābhāvo, viññatti, ajjhohāroti imānettha cattāri aṅgāni. Samuṭṭhānādīni addhānasadisānīti.
Sappiviññāpanasikkhāpadavaṇṇanā niṭṭhitā.
2.
Telaviññāpanādisikkhāpadavaṇṇanā
Dutiyādīsupi telādīni pubbe vuttavinicchayāni pāḷiyaṃ āgatāneva, pāḷiyaṃ anāgatesu pana aṭṭhasupi dukkaṭameva. Sesaṃ sabbattha paṭhame vuttasadisamevāti.
Telaviññāpanādisikkhāpadavaṇṇanā niṭṭhitā.
Kaṅkhāvitaraṇiyā pātimokkhavaṇṇanāya
Bhikkhunipātimokkhe
Pāṭidesanīyavaṇṇanā niṭṭhitā.
1.
Parimaṇḍalādisikkhāpadavaṇṇanā
Ito paraṃ pana sekhiyāni ceva adhikaraṇasamathā ca sabbapakārato bhikkhupātimokkhavaṇṇanāyaṃ vuttanayeneva veditabbāti.
Kaṅkhāvitaraṇiyā pātimokkhavaṇṇanāya
Bhikkhunipātimokkhavaṇṇanā niṭṭhitā.
Nigamanakathā
Ettāvatā ca -
Vinaye jātakaṅkhānaṃ, kaṅkhāvitaraṇatthiko.
Mahāvihāravāsīnaṃ, vācanāmagganissitaṃ.
Sabbaṃ aṭṭhakathāsāraṃ, pāḷiyatthañca kevalaṃ.
Mahāvihāravāsīnaṃ, porāṇaṭṭhakathāhi vā.
Sikkhitabbāva sakkaccaṃ, kaṅkhāvitaraṇī ayaṃ.
Dvāvīsati bhāṇavārapaamāṇāya pāḷiyā.
Aciraṃ sabbasattānaṃ, yantu sabbe manorathāti.
Paramavisuddhasaddhābuddhivīriyappaṭimaṇḍitena sīlācārajjavamaddavādiguṇasamudayasamuditena sakasamayasamayantaragahanajjhogāhaṇasamatthena paññāveyyattiyasamannāgatena tipiṭakapariyattippabhede sāṭṭhakathe satthusāsane appaṭihatañāṇappabhāvena mahāveyyākaraṇena karaṇasampattijanitasuviniggatamadhaurodāravacanalāvaṇṇayuttena yuttamuttavādinā vādīvarena mahākavinā pabhinnapaṭisambhidāparivāre chaḷabhiññādippabhedaguṇappaṭimaṇḍite uttarimanussadhamme suppatiṭṭhitabuddhīnaṃ theravaṃsappadīpānaṃ therānaṃ mahāvihāravāsīnaṃ vaṃsālaṅkārabhūtena vipulavisuddhabuddhinā buddhaghosoti garūhi gahitanāmadheyyena therena katā ayaṃ kaṅkhāvitaraṇī nāma pātimokkhavaṇṇanā -
Dassentī kulaputtānaṃ, nayaṃ sīlavisuddhiyā.
Lokamhi lokajeṭṭhassa, pavattati mahesinoti.
Kaṅkhāvitaraṇī-aṭṭhakathā niṭṭhitā.