10.
Dutiyasikkhattayasuttaṃ
91.
‘‘Tisso imā, bhikkhave, sikkhā.
Katamā tisso?
Adhisīlasikkhā, adhicittasikkhā, adhipaññāsikkhā.
‘‘Katamā ca, bhikkhave, adhisīlasikkhā? Idha, bhikkhave, bhikkhu sīlavā hoti...pe... samādāya sikkhati sikkhāpadesu. Ayaṃ vuccati, bhikkhave, adhisīlasikkhā.
‘‘Katamā ca, bhikkhave, adhicittasikkhā? Idha, bhikkhave, bhikkhu vivicceva kāmehi...pe... catutthaṃ jhānaṃ upasampajja viharati. Ayaṃ vuccati, bhikkhave, adhicittasikkhā.
‘‘Katamā ca, bhikkhave, adhipaññāsikkhā? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ vuccati, bhikkhave, adhipaññā sikkhā. Imā kho, bhikkhave, tisso sikkhā’’ti.
Thāmavā dhitimā jhāyī, sato guttindriyo care.
Yathā adho tathā uddhaṃ, yathā uddhaṃ tathā adho.
Abhibhuyya disā sabbā, appamāṇasamādhinā.
Tamāhu loke sambuddhaṃ, dhīraṃ paṭipadantaguṃ.
Pajjotasseva nibbānaṃ, vimokkho hoti cetaso’’ti. dasamaṃ;