2.
Uddesavāro
1.
Tattha katame soḷasa hārā?
Desanā vicayo yutti padaṭṭhāno lakkhaṇo catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano iti.
Tassānugīti
Catubyūho ca āvaṭṭo, vibhatti parivattano.
Adhiṭṭhāno parikkhāro, samāropano soḷaso.
Etesañceva bhavati, vitthāratayā nayavibhattīti.
2.
Tattha katame pañca nayā?
Nandiyāvaṭṭo tipukkhalo sīhavikkīḷito disālocano aṅkuso iti.
Tassānugīti
Sīhavikkīḷito nāma, tatiyo nayalañjako.
Pañcamo aṅkuso nāma, sabbe pañca nayā gatāti.
3.
Tattha katamāni aṭṭhārasa mūlapadāni?
Nava padāni kusalāni nava padāni akusalāni.
Tattha katamāni nava padāni akusalāni, taṇhā avijjā lobho doso moho subhasaññā sukhasaññā niccasaññā attasaññāti, imāni nava padāni akusalāni, yattha sabbo akusalapakkho saṅgahaṃ samosaraṇaṃ gacchati.
Tattha katamāni nava padāni kusalāni? Samatho vipassanā alobho adoso amoho asubhasaññā dukkhasaññā aniccasaññā anattasaññāti, imāni nava padāni kusalāni, yattha sabbo kusalapakkho saṅgahaṃ samosaraṇaṃ gacchati.
Tatridaṃ uddānaṃ
Caturo ca vipallāsā, kilesabhūmī nava padāni.
Caturo satipaṭṭhānā, indriyabhūmī nava padāni.
Ete kho mūlapadā, bhavanti aṭṭhārasa padānīti.
Uddesavāro.