Loading...

Paliverse

Search Ask PaliVerse Signin

The PaliVerse Project

A UniVerse of Wisdom
100%
Font family
Theme
Navigation & Search

Navigation & Search

10. Apadānapāḷi-1 - Therāpadānapāḷi
Pali Canon
Bookmarks

No bookmarks found.

Hello ,How can i help you ?

Previous Chapter 2. The Chapter on Sīhāsaniya (2. Sīhāsaniyavaggo)

3.

Subhūtivaggo

1.

Subhūtittheraapadānaṃ

1.

‘‘Himavantassāvidūre, nisabho nāma pabbato;

Assamo sukato mayhaṃ, paṇṇasālā sumāpitā.

2.

‘‘Kosiyo nāma nāmena, jaṭilo uggatāpano;

Ekākiyo adutiyo, vasāmi nisabhe tadā.

3.

‘‘Phalaṃ mūlañca paṇṇañca, na bhuñjāmi ahaṃ tadā;

Pavattaṃva supātāhaṃ, upajīvāmi tāvade.

4.

‘‘Nāhaṃ kopemi ājīvaṃ, cajamānopi jīvitaṃ;

Ārādhemi sakaṃ cittaṃ, vivajjemi anesanaṃ.

5.

‘‘Rāgūpasaṃhitaṃ cittaṃ, yadā uppajjate mama;

Sayaṃva paccavekkhāmi, ekaggo taṃ damemahaṃ.

6.

‘‘‘Rajjase rajjanīye ca, dussanīye ca dussase;

Muyhase mohanīye ca, nikkhamassu vanā tuvaṃ.

7.

‘‘‘Visuddhānaṃ ayaṃ vāso, nimmalānaṃ tapassinaṃ;

Mā kho visuddhaṃ dūsesi, nikkhamassu vanā tuvaṃ.

8.

‘‘‘Agāriko bhavitvāna, yadā puttaṃ, labhissasi;

Ubhopi mā virādhesi, nikkhamassu vanā tuvaṃ.

9.

‘‘‘Chavālātaṃ yathā kaṭṭhaṃ, na kvaci kiccakārakaṃ;

Neva gāme araññe vā, na hi taṃ kaṭṭhasammataṃ.

10.

‘‘‘Chavālātūpamo tvaṃsi, na gihī nāpi saññato;

Ubhato muttako ajja, nikkhamassu vanā tuvaṃ.

11.

‘‘‘Siyā nu kho tava etaṃ, ko pajānāti te idaṃ;

Saddhādhuraṃ vahisi me, kosajjabahulāya ca.

12.

‘‘‘Jigucchissanti taṃ viññū, asuciṃ nāgariko yathā;

Ākaḍḍhitvāna isayo, codayissanti taṃ sadā.

13.

‘‘‘Taṃ viññū pavadissanti, samatikkantasāsanaṃ;

Saṃvāsaṃ alabhanto hi, kathaṃ jīvihisi tuvaṃ.

14.

‘‘‘Tidhāpabhinnaṃ mātaṅgaṃ, kuñjaraṃ saṭṭhihāyanaṃ;

Balī nāgo upagantvā, yūthā nīharate gajaṃ.

15.

‘‘‘Yūthā vinissaṭo santo, sukhaṃ sātaṃ na vindati;

Dukkhito vimano hoti, pajjhāyanto pavedhati.

16.

‘‘‘Tatheva jaṭilā tampi, nīharissanti dummatiṃ;

Tehi tvaṃ nissaṭo santo, sukhaṃ sātaṃ na lacchasi.

17.

‘‘‘Divā vā yadi vā rattiṃ, sokasallasamappito;

Ḍayhasi pariḷāhena, gajo yūthāva nissaṭo.

18.

‘‘‘Jātarūpaṃ yathā kūṭaṃ, neva jhāyati katthaci;

Tathā sīlavihīno tvaṃ, na jhāyissasi katthaci.

19.

‘‘‘Agāraṃ vasamānopi, kathaṃ jīvihisi tuvaṃ;

Mattikaṃ pettikañcāpi, natthi te nihitaṃ dhanaṃ.

20.

‘‘‘Sayaṃ kammaṃ karitvāna, gatte sedaṃ pamocayaṃ;

Evaṃ jīvihisi gehe, sādhu te taṃ na ruccati.

21.

‘‘‘Evāhaṃ tattha vāremi, saṃkilesagataṃ manaṃ;

Nānādhammakathaṃ katvā, pāpā cittaṃ nivārayiṃ’.

22.

‘‘Evaṃ me viharantassa, appamādavihārino;

Tiṃsavassasahassāni, vipine me atikkamuṃ.

23.

‘‘Appamādarataṃ disvā, uttamatthaṃ gavesakaṃ;

Padumuttarasambuddho, āgacchi mama santikaṃ.

24.

‘‘Timbarūsakavaṇṇābho, appameyyo anūpamo;

Rūpenāsadiso buddho, ākāse caṅkamī tadā.

25.

‘‘Suphullo sālarājāva, vijjūvabbhaghanantare;

Ñāṇenāsadiso buddho, ākāse caṅkamī tadā.

26.

‘‘Sīharājā vasambhīto,

Gajarājāva dappito.

Lāsito byaggharājāva, ākāse caṅkamī tadā.

27.

‘‘Siṅgīnikkhasavaṇṇābho, khadiraṅgārasannibho;

Maṇi yathā jotiraso, ākāse caṅkamī tadā.

28.

‘‘Visuddhakelāsanibho, puṇṇamāyeva candimā;

Majjhanhikeva sūriyo, ākāse caṅkamī tadā.

29.

‘‘Disvā nabhe caṅkamantaṃ, evaṃ cintesahaṃ tadā;

‘Devo nu kho ayaṃ satto, udāhu manujo ayaṃ.

30.

‘‘‘Na me suto vā diṭṭho vā, mahiyā ediso naro;

Api mantapadaṃ atthi, ayaṃ satthā bhavissati’.

31.

‘‘Evāhaṃ cintayitvāna, sakaṃ cittaṃ pasādayiṃ;

Nānāpupphañca gandhañca, sannipātesahaṃ tadā.

32.

‘‘Pupphāsanaṃ paññapetvā, sādhucittaṃ manoramaṃ;

Narasārathinaṃ aggaṃ, idaṃ vacanamabraviṃ.

33.

‘‘‘Idaṃ me āsanaṃ vīra, paññattaṃ tavanucchavaṃ;

Hāsayanto mamaṃ cittaṃ, nisīda kusumāsane’.

34.

‘‘Nisīdi tattha bhagavā, asambhītova kesarī;

Sattarattindivaṃ buddho, pavare kusumāsane.

35.

‘‘Namassamāno aṭṭhāsiṃ, sattarattindivaṃ ahaṃ;

Vuṭṭhahitvā samādhimhā, satthā loke anuttaro;

Mama kammaṃ pakittento, idaṃ vacanamabravi.

36.

‘‘‘Bhāvehi buddhānussatiṃ, bhāvanānamanuttaraṃ;

Imaṃ satiṃ bhāvayitvā, pūrayissasi mānasaṃ.

37.

‘‘‘Tiṃsakappasahassāni, devaloke ramissasi;

Asītikkhattuṃ devindo, devarajjaṃ karissasi;

Sahassakkhattuṃ cakkavattī, rājā raṭṭhe bhavissasi.

38.

‘‘‘Padesarajjaṃ vipulaṃ, gaṇanāto asaṅkhiyaṃ;

Anubhossasi taṃ sabbaṃ, buddhānussatiyā phalaṃ.

39.

‘‘‘Bhavābhave saṃsaranto, mahābhogaṃ labhissasi;

Bhoge te ūnatā natthi, buddhānussatiyā phalaṃ.

40.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

41.

‘‘‘Asītikoṭiṃ chaḍḍetvā, dāse kammakare bahū;

Gotamassa bhagavato, sāsane pabbajissasi.

42.

‘‘‘Ārādhayitvā sambuddhaṃ, gotamaṃ sakyapuṅgavaṃ;

Subhūti nāma nāmena, hessati satthu sāvako.

43.

‘‘‘Bhikkhusaṅghe nisīditvā, dakkhiṇeyyaguṇamhi taṃ;

Tathāraṇavihāre ca, dvīsu agge ṭhapessati’.

44.

‘‘Idaṃ vatvāna sambuddho, jalajuttamanāmako;

Nabhaṃ abbhuggamī vīro, haṃsarājāva ambare.

45.

‘‘Sāsito lokanāthena, namassitvā tathāgataṃ;

Sadā bhāvemi mudito, buddhānussatimuttamaṃ.

46.

‘‘Tena kammena sukatena, cetanāpaṇidhīhi ca;

Jahitvā mānusaṃ dehaṃ, tāvatiṃsaṃ agacchahaṃ.

47.

‘‘Asītikkhattuṃ devindo, devarajjamakārayiṃ;

Sahassakkhattuṃ rājā ca, cakkavattī ahosahaṃ.

48.

‘‘Padesarajjaṃ vipulaṃ, gaṇanāto asaṅkhiyaṃ;

Anubhomi susampattiṃ, buddhānussatiyā phalaṃ.

49.

‘‘Bhavābhave saṃsaranto, mahābhogaṃ labhāmahaṃ;

Bhoge me ūnatā natthi, buddhānussatiyā phalaṃ.

50.

‘‘Satasahassito kappe, yaṃ kammamakariṃ tadā;

Duggatiṃ nābhijānāmi, buddhānussatiyā phalaṃ.

51.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā subhūti thero imā gāthāyo abhāsitthāti.

Subhūtittherassāpadānaṃ paṭhamaṃ.

2.

Upavānattheraapadānaṃ

52.

‘‘Padumuttaro nāma jino, sabbadhammāna pāragū;

Jalitvā aggikkhandhova, sambuddho parinibbuto.

53.

‘‘Mahājanā samāgamma, pūjayitvā tathāgataṃ;

Citaṃ katvāna sukataṃ, sarīraṃ abhiropayuṃ.

54.

‘‘Sarīrakiccaṃ katvāna, dhātuṃ tattha samānayuṃ;

Sadevamānusā sabbe, buddhathūpaṃ akaṃsu te.

55.

‘‘Paṭhamā kañcanamayā, dutiyāsi maṇīmayā;

Tatiyā rūpiyamayā, catutthī phalikāmayā.

56.

‘‘Tathā pañcamiyā bhūmi, lohitaṅgamayā ahu;

Chaṭṭhā masāragallassa, sabbaratanamayūpari.

57.

‘‘Jaṅghā maṇimayā āsi, vedikā ratanamayā;

Sabbasoṇṇamayo thūpo, uddhaṃ yojanamuggato.

58.

‘‘Devā tattha samāgantvā, ekato mantayuṃ tadā;

Mayampi thūpaṃ kassāma, lokanāthassa tādino.

59.

‘‘Dhātu āveṇikā natthi, sarīraṃ ekapiṇḍitaṃ;

Imamhi buddhathūpamhi, kassāma kañcukaṃ mayaṃ.

60.

‘‘Devā sattahi ratnehi, aññaṃ vaḍḍhesu yojanaṃ;

Thūpo dviyojanubbedho, timiraṃ byapahanti so.

61.

‘‘Nāgā tattha samāgantvā, ekato mantayuṃ tadā;

Manussā ceva devā ca, buddhathūpaṃ akaṃsu te.

62.

‘‘Mā no pamattā assumha, appamattā sadevakā;

Mayampi thūpaṃ kassāma, lokanāthassa tādino.

63.

‘‘Indanīlaṃ mahānīlaṃ, atho jotirasaṃ maṇiṃ;

Ekato sannipātetvā, buddhathūpaṃ achādayuṃ.

64.

‘‘Sabbaṃ maṇimayaṃ āsi, tāvatā buddhacetiyaṃ;

Tiyojanasamubbiddhaṃ, ālokakaraṇaṃ tadā.

65.

‘‘Garuḷā ca samāgantvā, ekato mantayuṃ tadā;

Manussā devā nāgā ca, buddhathūpaṃ akaṃsu te.

66.

‘‘‘Mā no pamattā assumha, appamattā sadevakā;

Mayampi thūpaṃ kassāma, lokanāthassa tādino’.

67.

‘‘Sabbaṃ maṇimayaṃ thūpaṃ, akaruṃ te ca kañcukaṃ;

Yojanaṃ tepi vaḍḍhesuṃ, āyataṃ buddhacetiyaṃ.

68.

‘‘Catuyojanamubbiddho, buddhathūpo virocati;

Obhāseti disā sabbā, sataraṃsīva uggato.

69.

‘‘Kumbhaṇḍā ca samāgantvā, ekato mantayuṃ tadā;

Manussā ceva devā ca, nāgā ca garuḷā tathā.

Paccekaṃ buddhaseṭṭhassa, akaṃsu thūpamuttamaṃ.

70.

‘‘‘Mā no pamattā assumha, appamattā sadevakā;

Mayampi thūpaṃ kassāma, lokanāthassa tādino;

Ratanehi chādessāma, āyataṃ buddhacetiyaṃ’.

71.

‘‘Yojanaṃ tepi vaḍḍhesuṃ, āyataṃ buddhacetiyaṃ;

Pañcayojanamubbiddho, thūpo obhāsate tadā.

72.

‘‘Yakkhā tattha samāgantvā, ekato mantayuṃ tadā;

Manussā devā nāgā ca, garuḷā kumbhaaṇḍakā.

73.

‘‘Paccekaṃ buddhaseṭṭhassa, akaṃsu thūpamuttamaṃ;

‘Mā no pamattā assumha, appamattā sadevakā.

74.

‘‘‘Mayampi thūpaṃ kassāma, lokanāthassa tādino;

Phalikāhi chādessāma, āyataṃ buddhacetiyaṃ’.

75.

‘‘Yojanaṃ tepi vaḍḍhesuṃ, āyataṃ buddhacetiyaṃ;

Cha yojanāni ubbiddho, thūpo obhāsate tadā.

76.

‘‘Gandhabbā ca samāgantvā, ekato mantayuṃ tadā;

‘Manujā devatā nāgā, garuḷā kumbhayakkhakā.

77.

‘‘‘Sabbekaṃsu buddhathūpaṃ, mayamettha akārakā;

Mayampi thūpaṃ kassāma, lokanāthassa tādino’.

78.

‘‘Vediyo satta katvāna, chattamāropayiṃsu te;

Sabbasoṇṇamayaṃ thūpaṃ, gandhabbā kārayuṃ tadā.

79.

‘‘Sattayojanamubbiddho, thūpo obhāsate tadā;

Rattindivā na ñāyanti, āloko hoti sabbadā.

80.

‘‘Abhibhonti na tassābhā, candasūrā satārakā;

Samantā yojanasate, padīpopi na pajjali.

81.

‘‘Tena kālena ye keci, thūpaṃ pūjenti mānusā;

Na te thūpamāruhanti, ambare ukkhipanti te.

82.

‘‘Devehi ṭhapito yakkho, abhisammatanāmako;

Dhajaṃ vā pupphadāmaṃ vā, abhiropeti uttari.

83.

‘‘Na te passanti taṃ yakkhaṃ, dāmaṃ passanti gacchato;

Evaṃ passitvā gacchantā, sabbe gacchanti suggatiṃ.

84.

‘‘Viruddhā ye pāvacane, pasannā ye ca sāsane;

Pāṭiheraṃ daṭṭhukāmā, thūpaṃ pūjenti mānusā.

85.

‘‘Nagare haṃsavatiyā, ahosiṃ bhatako tadā;

Āmoditaṃ janaṃ disvā, evaṃ cintesahaṃ tadā.

86.

‘‘‘Uḷāro bhagavā heso, yassa dhātudharedisaṃ;

Imā ca janatā tuṭṭhā, kāraṃ kubbaṃ na tappare.

87.

‘‘‘Ahampi kāraṃ kassāmi, lokanāthassa tādino;

Tassa dhammesu dāyādo, bhavissāmi anāgate’.

88.

‘‘Sudhotaṃ rajakenāhaṃ, uttareyyapaṭaṃ mama;

Veḷagge ālagetvāna, dhajaṃ ukkhipimambare.

89.

‘‘Abhisammatako gayha, ambarehāsi me dhajaṃ;

Vāteritaṃ dhajaṃ disvā, bhiyyo hāsaṃ janesahaṃ.

90.

‘‘Tattha cittaṃ pasādetvā, samaṇaṃ upasaṅkamiṃ;

Taṃ bhikkhuṃ abhivādetvā, vipākaṃ pucchahaṃ dhaje.

91.

‘‘So me kathesi ānanda, pītisañjananaṃ mama;

‘Tassa dhajassa vipākaṃ, anubhossasi sabbadā.

92.

‘‘‘Hatthī assā rathā pattī, senā ca caturaṅginī;

Parivāressanti taṃ niccaṃ, dhajadānassidaṃ phalaṃ.

93.

‘‘‘Saṭṭhitūriyasahassāni, bheriyo samalaṅkatā;

Parivāressanti taṃ niccaṃ, dhajadānassidaṃ phalaṃ.

94.

‘‘‘Chaḷāsītisahassāni, nāriyo samalaṅkatā;

Vicittavatthābharaṇā, āmuttamaṇikuṇḍalā.

95.

‘‘‘Aḷārapamhā hasulā, susaññā tanumajjhimā;

Parivāressanti taṃ niccaṃ, dhajadānassidaṃ phalaṃ.

96.

‘‘‘Tiṃsakappasahassāni, devaloke ramissasi;

Asītikkhattuṃ devindo, devarajjaṃ karissasi.

97.

‘‘‘Sahassakkhattuṃ rājā ca, cakkavattī bhavissasi;

Padesarajjaṃ vipulaṃ, gaṇanāto asaṅkhiyaṃ.

98.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

99.

‘‘‘Devalokā cavitvāna, sukkamūlena codito;

Puññakammena saṃyutto, brahmabandhu bhavissasi.

100.

‘‘‘Asītikoṭiṃ chaḍḍetvā, dāse kammakare bahū;

Gotamassa bhagavato, sāsane pabbajissasi.

101.

‘‘‘Ārādhayitvā sambuddhaṃ, gotamaṃ sakyapuṅgavaṃ;

Upavānoti nāmena, hessasi satthu sāvako’.

102.

‘‘Satasahasse kataṃ kammaṃ, phalaṃ dassesi me idha;

Sumutto saravegova kilese jhāpayī mama.

103.

‘‘Cakkavattissa santassa, catudīpissarassa me;

Tiyojanāni samantā, ussīsanti dhajā sadā.

104.

‘‘Satasahassito kappe, yaṃ kammamakariṃ tadā;

Duggatiṃ nābhijānāmi, dhajadānassidaṃ phalaṃ.

105.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā upavāno thero imā gāthāyo abhāsitthāti.

Upavānattherassāpadānaṃ dutiyaṃ.

3.

Tisaraṇagamaniyattheraapadānaṃ

106.

‘‘Nagare candavatiyā, mātuupaṭṭhāko ahuṃ;

Andhā mātā pitā mayhaṃ, te posemi ahaṃ tadā.

107.

‘‘Rahogato nisīditvā, evaṃ cintesahaṃ tadā;

Posento mātāpitaro, pabbajjaṃ na labhāmahaṃ.

108.

‘‘Mahandhakārapihitā, tividhaggīhi ḍayhare;

Etādise bhave jāte, natthi koci vināyako.

109.

‘‘Buddho loke samuppanno, dippati dāni sāsanaṃ;

Sakkā uddharituṃ attā, puññakāmena jantunā.

110.

‘‘Uggayha tīṇi saraṇe, paripuṇṇāni gopayiṃ;

Tena kammena sukatena, paṭimokkhāmi duggatiṃ.

111.

‘‘Nisabho nāma samaṇo, buddhassa aggasāvako;

Tamahaṃ upagantvāna, saraṇagamanaṃ gahiṃ.

112.

‘‘Vassasatasahassāni, āyu vijjati tāvade;

Tāvatā saraṇagamanaṃ, paripuṇṇaṃ agopayiṃ.

113.

‘‘Carime vattamānamhi, saraṇaṃ taṃ anussariṃ;

Tena kammena sukatena, tāvatiṃsaṃ agacchahaṃ.

114.

‘‘Devalokagato santo, puññakammasamāhito;

Yaṃ desaṃ upapajjāmi, aṭṭha hetū labhāmahaṃ.

115.

‘‘Disāsu pūjito homi, tikkhapañño bhavāmahaṃ;

Sabbe devānuvattanti, amitabhogaṃ labhāmahaṃ.

116.

‘‘Suvaṇṇavaṇṇo sabbattha, paṭikanto bhavāmahaṃ;

Mittānaṃ acalo homi, yaso abbhuggato mamaṃ.

117.

‘‘Asītikkhattu devindo, devarajjamakārayiṃ;

Dibbasukhaṃ anubhaviṃ, accharāhi purakkhato.

118.

‘‘Pañcasattatikkhattuñca, cakkavattī ahosahaṃ;

Padesarajjaṃ vipulaṃ, gaṇanāto asaṅkhiyaṃ.

119.

‘‘Pacchime bhave sampatte, puññakammasamāhito;

Pure sāvatthiyaṃ jāto, mahāsāle suaḍḍhake.

120.

‘‘Nagarā nikkhamitvāna, dārakehi purakkhato;

Hasakhiḍḍasamaṅgīhaṃ, saṅghārāmaṃ upāgamiṃ.

121.

‘‘Tatthaddasāsiṃ samaṇaṃ, vippamuttaṃ nirūpadhiṃ;

So me dhammamadesesi, saraṇañca adāsi me.

122.

‘‘Sohaṃ sutvāna saraṇaṃ, saraṇaṃ me anussariṃ;

Ekāsane nisīditvā, arahattamapāpuṇiṃ.

123.

‘‘Jātiyā sattame vasse, arahattamapāpuṇiṃ;

Upasampādayi buddho, guṇamaññāya cakkhumā.

124.

‘‘Aparimeyye ito kappe, saraṇāni agacchahaṃ;

Tato me sukataṃ kammaṃ, phalaṃ dassesi me idha.

125.

‘‘Sugopitaṃ me saraṇaṃ, mānasaṃ suppaṇīhitaṃ;

Anubhotvā yasaṃ sabbaṃ, pattomhi acalaṃ padaṃ.

126.

‘‘Yesaṃ sotāvadhānatthi, suṇotha mama bhāsato;

Ahaṃ vo kathayissāmi, sāmaṃ diṭṭhaṃ padaṃ mama.

127.

‘‘‘Buddho loke samuppanno, vattate jinasāsanaṃ;

Amatā vāditā bherī, sokasallavinodanā.

128.

‘‘‘Yathāsakena thāmena, puññakkhette anuttare;

Adhikāraṃ kareyyātha, passayissatha nibbutiṃ.

129.

‘‘‘Paggayha tīṇi saraṇe, pañcasīlāni gopiya;

Buddhe cittaṃ pasādetvā, dukkhassantaṃ karissatha.

130.

‘‘‘Sammā dhammaṃ bhāvetvāna, sīlāni parigopiya;

Aciraṃ arahattaṃ vo, sabbepi pāpuṇissatha.

131.

‘‘‘Tevijjo iddhipattomhi, cetopariyakovido;

Sāvako te mahāvīra, saraṇo vandati satthuno’.

132.

‘‘Aparimeyye ito kappe, saraṇaṃ buddhassa gacchahaṃ;

Duggatiṃ nābhijānāmi, saraṇaṃ gamane phalaṃ.

133.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā tisaraṇagamaniyo thero imā gāthāyo abhāsitthāti.

Tisaraṇagamaniyattherassāpadānaṃ tatiyaṃ.

4.

Pañcasīlasamādāniyattheraapadānaṃ

134.

‘‘Nagare candavatiyā, bhatako āsahaṃ tadā;

Parakammāyane yutto, pabbajjaṃ na labhāmahaṃ.

135.

‘‘Mahandhakārapihitā, tividhaggīhi ḍayhare;

Kena nu kho upāyena, visaṃyutto bhave ahaṃ.

136.

‘‘Deyyadhammo ca me natthi, varāko bhatako ahaṃ;

Yaṃnūnāhaṃ pañcasīlaṃ, rakkheyyaṃ paripūrayaṃ.

137.

‘‘Anomadassissa munino, nisabho nāma sāvako;

Tamahaṃ upasaṅkamma, pañcasikkhāpadaggahiṃ.

138.

‘‘Vassasatasahassāni, āyu vijjati tāvade;

Tāvatā pañcasīlāni, paripuṇṇāni gopayiṃ.

139.

‘‘Maccukāle ca sampatte, devā assāsayanti maṃ;

‘Ratho sahassayutto te, mārisāyaṃ upaṭṭhito’.

140.

‘‘Vattante carime citte, mama sīlaṃ anussariṃ;

Tena kammena sukatena, tāvatiṃsaṃ agacchahaṃ.

141.

‘‘Tiṃsakkhattuñca devindo, devarajjamakārayiṃ;

Dibbasukhaṃ anubhaviṃ, accharāhi purakkhato.

142.

‘‘Pañcasattatikkhattuñca, cakkavattī ahosahaṃ;

Padesarajjaṃ vipulaṃ, gaṇanāto asaṅkhiyaṃ.

143.

‘‘Devalokā cavitvāna, sukkamūlena codito;

Pure vesāliyaṃ jāto, mahāsāle suaḍḍhake.

144.

‘‘Vassūpanāyike kāle, dippante jinasāsane;

Mātā ca me pitā ceva, pañcasikkhāpadaggahuṃ.

145.

‘‘Saha sutvānahaṃ sīlaṃ, mama sīlaṃ anussariṃ;

Ekāsane nisīditvā, arahattamapāpuṇiṃ.

146.

‘‘Jātiyā pañcavassena, arahattamapāpuṇiṃ;

Upasampādayi buddho, guṇamaññāya cakkhumā.

147.

‘‘Paripuṇṇāni gopetvā, pañcasikkhāpadānahaṃ;

Aparimeyye ito kappe, vinipātaṃ na gacchahaṃ.

148.

‘‘Svāhaṃ yasamanubhaviṃ, tesaṃ sīlāna vāhasā;

Kappakoṭimpi kittento, kittaye ekadesakaṃ.

149.

‘‘Pañcasīlāni gopetvā, tayo hetū labhāmahaṃ;

Dīghāyuko mahābhogo, tikkhapañño bhavāmahaṃ.

150.

‘‘Saṃkittento ca sabbesaṃ, abhimattañca porisaṃ;

Bhavābhave saṃsaritvā, ete ṭhāne labhāmahaṃ.

151.

‘‘Aparimeyyasīlesu, vattantā jinasāvakā;

Bhavesu yadi rajjeyyuṃ, vipāko kīdiso bhave.

152.

‘‘Suciṇṇaṃ me pañcasīlaṃ, bhatakena tapassinā;

Tena sīlenahaṃ ajja, mocayiṃ sabbabandhanā.

153.

‘‘Aparimeyye ito kappe, pañcasīlāni gopayiṃ;

Duggatiṃ nābhijānāmi, pañcasīlānidaṃ phalaṃ.

154.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā pañcasīlasamādāniyo thero imā gāthāyo abhāsitthāti.

Pañcasīlasamādāniyattherassāpadānaṃ catutthaṃ.

5.

Annasaṃsāvakattheraapadānaṃ

155.

‘‘Suvaṇṇavaṇṇaṃ sambuddhaṃ, gacchantaṃ antarāpaṇe;

Kañcanagghiyasaṃkāsaṃ, bāttiṃsavaralakkhaṇaṃ.

156.

‘‘Siddhatthaṃ lokapajjotaṃ, appameyyaṃ anopamaṃ;

Alatthaṃ paramaṃ pītiṃ, disvā dantaṃ jutindharaṃ.

157.

‘‘Sambuddhaṃ abhināmetvā, bhojayiṃ taṃ mahāmuniṃ;

Mahākāruṇiko loke, anumodi mamaṃ tadā.

158.

‘‘Tasmiṃ mahākāruṇike, paramassāsakārake;

Buddhe cittaṃ pasādetvā, kappaṃ saggamhi modahaṃ.

159.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, bhikkhādānassidaṃ phalaṃ.

160.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā annasaṃsāvako thero imā gāthāyo abhāsitthāti.

Annasaṃsāvakattherassāpadānaṃ pañcamaṃ.

6.

Dhūpadāyakattheraapadānaṃ

161.

‘‘Siddhatthassa bhagavato, lokajeṭṭhassa tādino;

Kuṭidhūpaṃ mayā dinnaṃ, vippasannena cetasā.

162.

Yaṃ yaṃ yonupapajjāmi, devattaṃ atha mānusaṃ;

Sabbesampi piyo homi, dhūpadānassidaṃ phalaṃ.

163.

‘‘Catunnavutito kappe, yaṃ dhūpamadadiṃ tadā;

Duggatiṃ nābhijānāmi, dhūpadānassidaṃ phalaṃ.

164.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā dhūpadāyako thero imā gāthāyo abhāsitthāti.

Dhūpadāyakattherassāpadānaṃ chaṭṭhaṃ.

7.

Pulinapūjakattheraapadānaṃ

165.

‘‘Vipassissa bhagavato, bodhiyā pādaputtame;

Purāṇapulinaṃ hitvā, suddhapulinamākiriṃ.

166.

‘‘Ekanavutito kappe, yaṃ pulinamadāsahaṃ;

Duggatiṃ nābhijānāmi, pulinadānassidaṃ phalaṃ.

167.

‘‘Tiṃsatime ito kappe, rājā āsiṃ janādhibhū;

Mahāpulinanāmena, cakkavattī mahabbalo.

168.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā pulinapūjako thero imā gāthāyo abhāsitthāti.

Pulinapūjakattherassāpadānaṃ sattamaṃ.

8.

Uttiyattheraapadānaṃ

169.

‘‘Candabhāgānadītīre, susumāro ahaṃ tadā;

Sagocarappasutohaṃ, nadītitthaṃ agacchahaṃ.

170.

‘‘Siddhattho tamhi samaye, sayambhū aggapuggalo;

Nadiṃ taritukāmo so, nadītitthaṃ upāgami.

171.

‘‘Upāgate ca sambuddhe, ahampi tatthupāgamiṃ;

Upagantvāna sambuddhaṃ, imaṃ vācaṃ udīrayiṃ.

172.

‘‘‘Abhirūha mahāvīra, tāressāmi ahaṃ tuvaṃ;

Pettikaṃ visayaṃ mayhaṃ, anukampa mahāmuni’.

173.

‘‘Mama uggajjanaṃ sutvā, abhirūhi mahāmuni;

Haṭṭho haṭṭhena cittena, tāresiṃ lokanāyakaṃ.

174.

‘‘Nadiyā pārime tīre, siddhattho lokanāyako;

Assāsesi mamaṃ tattha, amataṃ pāpuṇissasi.

175.

‘‘Tamhā kāyā cavitvāna, devalokaṃ āgacchahaṃ;

Dibbasukhaṃ anubhaviṃ, accharāhi purakkhato.

176.

‘‘Sattakkhattuñca devindo, devarajjamakāsahaṃ;

Tīṇikkhattuṃ cakkavattī, mahiyā issaro ahuṃ.

177.

‘‘Vivekamanuyuttohaṃ, nipako ca susaṃvuto;

Dhāremi antimaṃ dehaṃ, sammāsambuddhasāsane.

178.

‘‘Catunnavutito kappe, tāresiṃ yaṃ narāsabhaṃ;

Duggatiṃ nābhijānāmi, taraṇāya idaṃ phalaṃ.

179.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā uttiyo thero imā gāthāyo abhāsitthāti.

Uttiyattherassāpadānaṃ aṭṭhamaṃ.

9.

Ekañjalikattheraapadānaṃ

180.

‘‘Suvaṇṇavaṇṇaṃ sambuddhaṃ, gacchantaṃ antarāpaṇe;

Vipassiṃ satthavāhaggaṃ, naravaraṃ vināyakaṃ.

181.

‘‘Adantadamanaṃ tādiṃ, mahāvādiṃ mahāmatiṃ;

Disvā pasanno sumano, ekañjalimakāsahaṃ.

182.

‘‘Ekanavutito kappe, yamañjaliṃ kariṃ tadā;

Duggatiṃ nābhijānāmi, añjalissa idaṃ phalaṃ.

183.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ekañjaliko thero imā gāthāyo abhāsitthāti.

Ekañjalikattherassāpadānaṃ navamaṃ.

10.

Khomadāyakattheraapadānaṃ

184.

‘‘Nagare bandhumatiyā, ahosiṃ vāṇijo tadā;

Teneva dāraṃ posemi, ropemi bījasampadaṃ.

185.

‘‘Rathiyaṃ paṭipannassa, vipassissa mahesino;

Ekaṃ khomaṃ mayā dinnaṃ, kusalatthāya satthuno.

186.

‘‘Ekanavutito kappe, yaṃ khomamadadiṃ tadā;

Duggatiṃ nābhijānāmi, khomadānassidaṃ phalaṃ.

187.

‘‘Sattarase ito kappe, eko sindhavasandhano;

Sattaratanasampanno, catudīpamhi issaro.

188.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā khomadāyako thero imā gāthāyo abhāsitthāti.

Khomadāyakattherassāpadānaṃ dasamaṃ.

Tassuddānaṃ -

Susūti upavāno ca, saraṇo sīlagāhako;

Annasaṃsāvako khomadāyī ca, daseva tatiye gaṇe;

Añjalī khomadāyī ca, daseva tatiye gaṇe;

Pañcālīsītisataṃ vuttā, gāthāyo sabbapiṇḍitā.

Subhūtivaggo tatiyo.

Catutthabhāṇavāraṃ.

Next Chapter 4. The Chapter on Kuṇḍadhāna (4. Kuṇḍadhānavaggo)
×

Error: Contact form not found.

×

Add notes for personal use

↑