9.
Dutiyaparihānisuttaṃ
29.
‘‘Sattime, bhikkhave, dhammā upāsakassa parihānāya saṃvattanti.
Katame satta?
Bhikkhudassanaṃ hāpeti, saddhammassavanaṃ pamajjati, adhisīle na sikkhati, appasādabahulo hoti, bhikkhūsu theresu ceva navesu ca majjhimesu ca upārambhacitto dhammaṃ suṇāti randhagavesī, ito bahiddhā dakkhiṇeyyaṃ gavesati, tattha ca pubbakāraṃ karoti.
Ime kho, bhikkhave, satta dhammā upāsakassa parihānāya saṃvattanti.
‘‘Sattime, bhikkhave, dhammā upāsakassa aparihānāya saṃvattanti. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta dhammā upāsakassa aparihānāya saṃvattantī’’ti. Idamavoca bhagavā. Idaṃ vatvāna sugato athāparaṃ etadavoca satthā -
Savanañca ariyadhammānaṃ, adhisīle na sikkhati.
Upārambhakacitto ca, saddhammaṃ sotumicchati.
Tattheva ca pubbakāraṃ, yo karoti upāsako.
Upāsako sevamāno, saddhammā parihāyati.
Savanañca ariyadhammānaṃ, adhisīle ca sikkhati.
Anupārambhacitto ca, saddhammaṃ sotumicchati.
Idheva ca pubbakāraṃ, yo karoti upāsako.
Upāsako sevamāno, saddhammā na parihāyatī’’ti. navamaṃ;