3.
Paṭhamarūpārāmasuttaṃ
136.
‘‘Rūpārāmā, bhikkhave, devamanussā rūparatā rūpasammuditā.
Rūpavipariṇāmavirāganirodhā dukkhā, bhikkhave, devamanussā viharanti.
Saddārāmā, bhikkhave, devamanussā saddaratā saddasammuditā.
Saddavipariṇāmavirāganirodhā dukkhā, bhikkhave, devamanussā viharanti.
Gandhārāmā...
rasārāmā...
phoṭṭhabbārāmā...
dhammārāmā, bhikkhave, devamanussā dhammaratā dhammasammuditā.
Dhammavipariṇāmavirāganirodhā dukkhā, bhikkhave, devamanussā viharanti.
Tathāgato ca kho, bhikkhave, arahaṃ sammāsambuddho rūpānaṃ samudayañca atthaṅgamañca assādañca ādīnavaṃ ca nissaraṇañca yathābhūtaṃ viditvā na rūpārāmo na rūparato na rūpasammudito.
Rūpavipariṇāmavirāganirodhā sukho, bhikkhave, tathāgato viharati.
Saddānaṃ...
gandhānaṃ...
rasānaṃ...
phoṭṭhabbānaṃ...
dhammānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā na dhammārāmo, na dhammarato, na dhammasammudito.
Dhammavipariṇāmavirāganirodhā sukho, bhikkhave, tathāgato viharati’’.
Idamavoca bhagavā.
Idaṃ vatvāna sugato athāparaṃ etadavoca satthā -
Iṭṭhā kantā manāpā ca, yāvatatthīti vuccati.
Yattha cete nirujjhanti, taṃ tesaṃ dukkhasammataṃ.
Paccanīkamidaṃ hoti, sabbalokena passataṃ.
Yaṃ pare dukkhato āhu, tadariyā sukhato vidū.
Nivutānaṃ tamo hoti, andhakāro apassataṃ.
Santike na vijānanti, maggā dhammassa akovidā.
Māradheyyānupannehi, nāyaṃ dhammo susambudho.
Yaṃ padaṃ sammadaññāya, parinibbanti anāsavā’’ti. tatiyaṃ;