2.
Udayasuttaṃ
198.
Sāvatthinidānaṃ.
Atha kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami.
Atha kho udayo brāhmaṇo bhagavato pattaṃ odanena pūresi.
Dutiyampi kho bhagavā pubbaṇhasamayaṃ nivāsetvā pattacīvaramādāya yena udayassa brāhmaṇassa nivesanaṃ tenupasaṅkami...pe...
tatiyampi kho udayo brāhmaṇo bhagavato pattaṃ odanena pūretvā bhagavantaṃ etadavoca -
‘‘pakaṭṭhakoyaṃ samaṇo gotamo punappunaṃ āgacchatī’’ti.
Punappunaṃ khettaṃ kasanti kassakā, punappunaṃ dhaññamupeti raṭṭhaṃ.
Punappunaṃ dānapatī daditvā, punappunaṃ saggamupenti ṭhānaṃ.
Punappunaṃ kilamati phandati ca, punappunaṃ gabbhamupeti mando.
Maggañca laddhā apunabbhavāya, na punappunaṃ jāyati bhūripañño’’ti.
Evaṃ vutte, udayo brāhmaṇo bhagavantaṃ etadavoca - ‘‘abhikkantaṃ, bho gotama...pe... upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.