9.
Upasenasuttaṃ
39.
Evaṃ me sutaṃ -
ekaṃ samayaṃ bhagavā rājagahe viharati veḷuvane kalandakanivāpe.
Atha kho āyasmato upasenassa vaṅgantaputtassa rahogatassa paṭisallīnassa evaṃ cetaso parivitakko udapādi -
‘‘lābhā vata me, suladdhaṃ vata me, satthā ca me bhagavā arahaṃ sammāsambuddho;
svākkhāte camhi dhammavinaye agārasmā anagāriyaṃ pabbajito;
sabrahmacārino ca me sīlavanto kalyāṇadhammā;
sīlesu camhi paripūrakārī;
susamāhito camhi ekaggacitto;
arahā camhi khīṇāsavo;
mahiddhiko camhi mahānubhāvo.
Bhaddakaṃ me jīvitaṃ, bhaddakaṃ maraṇa’’nti.
Atha kho bhagavā āyasmato upasenassa vaṅgantaputtassa cetasā cetoparivitakkamaññāya tāyaṃ velāyaṃ imaṃ udānaṃ udānesi -
Sa ve diṭṭhapado dhīro, sokamajjhe na socati.
Vikkhīṇo jātisaṃsāro, natthi tassa punabbhavo’’ti. navamaṃ;