10.
Uṭṭhānasuttaṃ
334.
Uṭṭhahatha nisīdatha, ko attho supitena vo;
Āturānañhi kā niddā, sallaviddhāna ruppataṃ.
335.
Uṭṭhahatha nisīdatha, daḷhaṃ sikkhatha santiyā;
Mā vo pamatte viññāya, maccurājā amohayittha vasānuge.
336.
Yāya devā manussā ca, sitā tiṭṭhanti atthikā;
Tarathetaṃ visattikaṃ, khaṇo vo mā upaccagā;
Khaṇātītā hi socanti, nirayamhi samappitā.
337.
Pamādo rajo pamādo, pamādānupatito rajo;
Appamādena vijjāya, abbahe sallamattanoti.
Uṭṭhānasuttaṃ dasamaṃ niṭṭhitaṃ.