7.
Sukhapatthanāsuttaṃ
76.
Vuttañhetaṃ bhagavatā, vuttamarahatāti me sutaṃ -
‘‘Tīṇimāni, bhikkhave, sukhāni patthayamāno sīlaṃ rakkheyya paṇḍito. Katamāni tīṇi? Pasaṃsā me āgacchatūti sīlaṃ rakkheyya paṇḍito, bhogā me uppajjantūti sīlaṃ rakkheyya paṇḍito, kāyassa bhedā paraṃ maraṇā sugatiṃ saggaṃ lokaṃ upapajjissāmīti sīlaṃ rakkheyya paṇḍito. Imāni kho, bhikkhave, tīṇi sukhāni patthayamāno sīlaṃ rakkheyya paṇḍito’’ti. Etamatthaṃ bhagavā avoca. Tatthetaṃ iti vuccati -
Pasaṃsaṃ vittalābhañca, pecca sagge pamodanaṃ.
Saṅkiyo hoti pāpasmiṃ, avaṇṇo cassa rūhati.
Sa ve tādisako hoti, sahavāso hi tādiso.
Saro diddho kalāpaṃva, alittamupalimpati;
Upalepabhayā dhīro, neva pāpasakhā siyā.
Kusāpi pūti vāyanti, evaṃ bālūpasevanā.
Pattāpi surabhi vāyanti, evaṃ dhīrūpasevanā.
Asante nupaseveyya, sante seveyya paṇḍito;
Asanto nirayaṃ nenti, santo pāpenti suggati’’nti.
Ayampi attho vutto bhagavatā, iti me sutanti. Sattamaṃ.