9.
Mettasuttaṃ
62.
‘‘Mā, bhikkhave, puññānaṃ bhāyittha.
Sukhassetaṃ, bhikkhave, adhivacanaṃ yadidaṃ puññāni.
Abhijānāmi kho panāhaṃ, bhikkhave, dīgharattaṃ katānaṃ puññānaṃ dīgharattaṃ iṭṭhaṃ kantaṃ manāpaṃ vipākaṃ paccanubhūtaṃ.
Satta vassāni mettaṃ cittaṃ bhāvesiṃ.
Satta vassāni mettaṃ cittaṃ bhāvetvā satta saṃvaṭṭavivaṭṭakappe nayimaṃ lokaṃ punāgamāsiṃ.
Saṃvaṭṭamāne sudāhaṃ, bhikkhave, loke ābhassarūpago homi, vivaṭṭamāne loke suññaṃ brahmavimānaṃ upapajjāmi.
‘‘Tatra sudaṃ, bhikkhave, brahmā homi mahābrahmā abhibhū anabhibhūto aññadatthudaso vasavattī. Chattiṃsakkhattuṃ kho panāhaṃ, bhikkhave, sakko ahosiṃ devānamindo; anekasatakkhattuṃ rājā ahosiṃ cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. Tassa mayhaṃ, bhikkhave, imāni satta ratanāni ahesuṃ, seyyathidaṃ - cakkaratanaṃ, hatthiratanaṃ, assaratanaṃ, maṇiratanaṃ, itthiratanaṃ, gahapatiratanaṃ, pariṇāyakaratanameva sattamaṃ. Parosahassaṃ kho pana me, bhikkhave, puttā ahesuṃ sūrā vīraṅgarūpā parasenappamaddanā. So imaṃ pathaviṃ sāgarapariyantaṃ adaṇḍena asatthena dhammena abhivijiya ajjhāvasi’’nti.
Mettaṃ cittaṃ vibhāvetvā, satta vassāni bhikkhavo;
Sattasaṃvaṭṭavivaṭṭakappe, nayimaṃ lokaṃ punāgamiṃ.
Vivaṭṭamāne lokasmiṃ, suññabrahmūpago ahuṃ.
Chattiṃsakkhattuṃ devindo, devarajjamakārayiṃ.
Muddhāvasitto khattiyo, manussādhipatī ahuṃ.
Asāhasena kammena, samena anusāsi taṃ.
Mahaddhane mahābhoge, aḍḍhe ajāyihaṃ kule.
Buddhā saṅgāhakā loke, tehi etaṃ sudesitaṃ.
Pahūtavittūpakaraṇo, rājā hoti patāpavā.
Ko sutvā nappasīdeyya, api kaṇhābhijātiyo.
Saddhammo garukātabbo, saraṃ buddhānasāsana’’nti. navamaṃ;