10.
Udāyīsuttaṃ
40.
Atha kho udāyī brāhmaṇo yena bhagavā tenupasaṅkami;
upasaṅkamitvā bhagavatā...pe...
ekamantaṃ nisinno kho udāyī brāhmaṇo bhagavantaṃ etadavoca -
‘‘bhavampi no gotamo yaññaṃ vaṇṇetī’’ti?
‘‘Na kho ahaṃ, brāhmaṇa, sabbaṃ yaññaṃ vaṇṇemi;
na panāhaṃ, brāhmaṇa, sabbaṃ yaññaṃ na vaṇṇemi.
Yathārūpe kho, brāhmaṇa, yaññe gāvo haññanti, ajeḷakā haññanti, kukkuṭasūkarā haññanti, vividhā pāṇā saṅghātaṃ āpajjanti;
evarūpaṃ kho ahaṃ, brāhmaṇa, sārambhaṃ yaññaṃ na vaṇṇemi.
Taṃ kissa hetu?
Evarūpañhi, brāhmaṇa, sārambhaṃ yaññaṃ na upasaṅkamanti arahanto vā arahattamaggaṃ vā samāpannā.
‘‘Yathārūpe ca kho, brāhmaṇa, yaññe neva gāvo haññanti, na ajeḷakā haññanti, na kukkuṭasūkarā haññanti, na vividhā pāṇā saṅghātaṃ āpajjanti; evarūpaṃ kho ahaṃ, brāhmaṇa, nirārambhaṃ yaññaṃ vaṇṇemi, yadidaṃ niccadānaṃ anukulayaññaṃ. Taṃ kissa hetu? Evarūpañhi, brāhmaṇa, nirārambhaṃ yaññaṃ upasaṅkamanti arahanto vā arahattamaggaṃ vā samāpannā’’ti.
Tādisaṃ upasaṃyanti, saññatā brahmacārayo.
Yaññametaṃ pasaṃsanti, buddhā yaññassa kovidā.
Pasannacitto yajati, sukhette brahmacārisu.
Yañño ca vipulo hoti, pasīdanti ca devatā.
Abyābajjhaṃ sukhaṃ lokaṃ, paṇḍito upapajjatī’’ti. dasamaṃ;